kahani-kar mere waqiat baqi hain

kahānī-kār mire vāqi.āt baaqī haiñ

bahut haiñ qisse bahut mo.ajizāt baaqī haiñ

ġhalat samajh liyā āsān rāstā chun kar

chalo ki manziloñ kī mushkilāt baaqī haiñ

mujhe ḳhabar hī nahīñ maiñ kahāñ se aaya huuñ

na hī ḳhabar ki koī ḳhvāhishāt baaqī haiñ

ye āshiyānā mirā thā jo jal ke raakh huā

subūt laayā huuñ maiñ kāġhzāt baaqī haiñ

abhī to baaqī hai nabzoñ meñ ik harārat sī

yuuñ lag rahā hai baḌe hādsāt baaqī haiñ

abhī to ahd-e-vafā se mukarnā hai is ko

abhī to zindagī ke tajrabāt baaqī haiñ

ye kaun gard-e-safar ghar pe mere chhoḌ gayā

ye kis ke hisse the jo sānehāt baaqī haiñ

ujaḌ rahe haiñ alāmat ke shahr bhī 'sayyad'

jo baḳht par the mire bāqiyāt baaqī haiñ

kahani-kar mere waqiat baqi hain

bahut hain qisse bahut moajizat baqi hain

ghalat samajh liya aasan rasta chun kar

chalo ki manzilon ki mushkilat baqi hain

mujhe KHabar hi nahin main kahan se aaya hun

na hi KHabar ki koi KHwahishat baqi hain

ye aashiyana mera tha jo jal ke rakh hua

subut laya hun main kaghzat baqi hain

abhi to baqi hai nabzon mein ek hararat si

yun lag raha hai baDe hadsat baqi hain

abhi to ahd-e-wafa se mukarna hai is ko

abhi to zindagi ke tajrabaat baqi hain

ye kaun gard-e-safar ghar pe mere chhoD gaya

ye kis ke hisse the jo sanehat baqi hain

ujaD rahe hain alamat ke shahr bhi 'sayyad'

jo baKHt par the mere baqiyat baqi hain