kahen kya ki kya kya sitam dekhte hain

kaheñ kyā ki kyā kyā sitam dekhte haiñ

likhā hai jo qismat meñ ham dekhte haiñ

kabhī aah na.ara kabhī khīñchte haiñ

ham is saaz kā zer-o-bam dekhte haiñ

ḳhat-e-sar-navisht apnā ham paḌh rahe haiñ

tumhārā jo naqsh-e-qadam dekhte haiñ

mire rū-ba-rū vo baham ġhair se haiñ

na dekhe koī jo ki ham dekhte haiñ

rahī gar talāsh-e-kamar yuuñ hī ham ko

koī dam meñ mulk-e-adam dekhte haiñ

hazāroñ gumāñ dil meñ hote haiñ paidā

tire haath meñ jab qalam dekhte haiñ

nahīñ jaanā kis din tū ġhairoñ ke ghar par

sarīhan to āñkhoñ se ham dekhte haiñ

nahīñ aarzū kuchh bhī bose kī ham ko

magar ham tumhārā karam dekhte haiñ

jo aalam ki dekhā hai kū-e-butāñ meñ

ḳhudā kī ḳhudā.ī meñ kam dekhte haiñ

nazar aate ho 'sehr' āshiq kisī par

tumheñ har ghaḌī chashm-e-nam dekhte haiñ

kahen kya ki kya kya sitam dekhte hain

likha hai jo qismat mein hum dekhte hain

kabhi aah nara kabhi khinchte hain

hum is saz ka zer-o-bam dekhte hain

KHat-e-sar-nawisht apna hum paDh rahe hain

tumhaara jo naqsh-e-qadam dekhte hain

mere ru-ba-ru wo baham ghair se hain

na dekhe koi jo ki hum dekhte hain

rahi gar talash-e-kamar yun hi hum ko

koi dam mein mulk-e-adam dekhte hain

hazaron guman dil mein hote hain paida

tere hath mein jab qalam dekhte hain

nahin jaana kis din tu ghairon ke ghar par

sarihan to aankhon se hum dekhte hain

nahin aarzu kuchh bhi bose ki hum ko

magar hum tumhaara karam dekhte hain

jo aalam ki dekha hai ku-e-butan mein

KHuda ki KHudai mein kam dekhte hain

nazar aate ho 'sehr' aashiq kisi par

tumhein har ghaDi chashm-e-nam dekhte hain