kahi na un se jo honTon pe baat aai bhi

kahī na un se jo hoñToñ pe baat aa.ī bhī

ki āshnā.ī bhī thī sharm-e-āshnā.ī bhī

koī talab thī to dast-e-savāl phailāte

magar milī thī kahāñ sūrat-e-gadā.ī bhī

kaho havā se chale aaj raat tham tham kar

ki aag hai mire dāman meñ kuchh parā.ī bhī

tire karam ke fasāne to shahr bhar se kahe

tire sitam kī kahāñ jā ke deñ dahā.ī bhī

tirī sadā pe gumāñ dhaḌkanoñ kā hotā thā

'ajab thā ab ke sukūt-e-shab-e-judā.ī bhī

tumhārī ham-safarī ke bhī the bahut ehsāñ

huī hai vaj.h-e-nadāmat shikasta-pā.ī bhī

nazar bujhī to mile raushnī kahāñ 'hashamī'

jalā ke sham' bahut aañkh se lagā.ī bhī

kahi na un se jo honTon pe baat aai bhi

ki aashnai bhi thi sharm-e-ashnai bhi

koi talab thi to dast-e-sawal phailate

magar mili thi kahan surat-e-gadai bhi

kaho hawa se chale aaj raat tham tham kar

ki aag hai mere daman mein kuchh parai bhi

tere karam ke fasane to shahr bhar se kahe

tere sitam ki kahan ja ke den dahai bhi

teri sada pe guman dhaDkanon ka hota tha

'ajab tha ab ke sukut-e-shab-e-judai bhi

tumhaari ham-safari ke bhi the bahut ehsan

hui hai wajh-e-nadamat shikasta-pai bhi

nazar bujhi to mile raushni kahan 'hashami'

jala ke sham' bahut aankh se lagai bhi