kahin bhi ja ke basera karen udhar hi ke hain

kahīñ bhī jā ke baserā kareñ udhar hī ke haiñ

hamāre saare havāle hamāre ghar hī ke haiñ

hamārī saañs talak hī hamārā virsa hai

hamāre ḳhvāb bhī āñkhoñ meñ raat bhar hī ke haiñ

maiñ in se TuuT ke kartā huuñ pyaar kyuuñ na karūñ

ye saare phuul ye patte mire shajar hī ke haiñ

vo jis ko chāhe banā de kalām-e-fan kī misāl

tamām mo.ajize us dast-e-kūza-gar hī ke haiñ

tirī nazar se tire dil tak aane jaane meñ

jo fāsle haiñ vo lagtā hai umr bhar hī ke haiñ

karūñ to kaise karūñ maiñ tirī galī meñ qayām

mire to jo bhī sitāre haiñ vo safar hī ke haiñ

kahin bhi ja ke basera karen udhar hi ke hain

hamare sare hawale hamare ghar hi ke hain

hamari sans talak hi hamara wirsa hai

hamare KHwab bhi aankhon mein raat bhar hi ke hain

main in se TuT ke karta hun pyar kyun na karun

ye sare phul ye patte mere shajar hi ke hain

wo jis ko chahe bana de kalam-e-fan ki misal

tamam moajize us dast-e-kuza-gar hi ke hain

teri nazar se tere dil tak aane jaane mein

jo fasle hain wo lagta hai umr bhar hi ke hain

karun to kaise karun main teri gali mein qayam

mere to jo bhi sitare hain wo safar hi ke hain