kahin bhi ja ke jo rahte to hum kahan rahte

kahīñ bhī jā ke jo rahte to ham kahāñ rahte

vahī zamīñ pe vahī zer-e-āsmāñ rahte

koī jagah na milī tere vahm se ḳhālī

ye tere dil-shikan ārām se jahāñ rahte

ye aur baat ki ḳhush aa ga.ī tirī sohbat

ham apne faiz-e-tabī.at se bhī javāñ rahte

sanad jo qābiliyat kī hameñ baham aatī

muqāble ke ka.ī aur imtihāñ rahte

na dī zamāne ne mohlat vagarna ham vo the

hamesha ahl-e-mohabbat ke darmiyāñ rahte

qabā.eñ un se banā lī haiñ nā-ḳhudāoñ ne

safar ba-ḳhair thā sālim jo bādbāñ rahte

pahāḌ rāsta 'shaukat' zarūr de dete

na jazb jharne jo hote ravāñ-davāñ rahte

kahin bhi ja ke jo rahte to hum kahan rahte

wahi zamin pe wahi zer-e-asman rahte

koi jagah na mili tere wahm se KHali

ye tere dil-shikan aaram se jahan rahte

ye aur baat ki KHush aa gai teri sohbat

hum apne faiz-e-tabiat se bhi jawan rahte

sanad jo qabiliyat ki hamein baham aati

muqable ke kai aur imtihan rahte

na di zamane ne mohlat wagarna hum wo the

hamesha ahl-e-mohabbat ke darmiyan rahte

qabaen un se bana li hain na-KHudaon ne

safar ba-KHair tha salim jo baadban rahte

pahaD rasta 'shaukat' zarur de dete

na jazb jharne jo hote rawan-dawan rahte