kahin din guzar gaya hai kahin raat kaT gai hai

kahīñ din guzar gayā hai kahīñ raat kaT ga.ī hai

ye na pūchh kaise tujh bin ye hayāt kaT ga.ī hai

ye udaas udaas mausam ye ḳhizāñ ḳhizāñ fazā.eñ

vahī zindagī thī jitnī tire saath kaT ga.ī hai

na tujhe ḳhabar hai merī na mujhe ḳhabar hai terī

tirī dāstāñ se jaise mirī zaat kaT ga.ī hai

ye tirā mizāj tauba ye tirā ġhurūr tauba

tirī bazm meñ hamesha mirī baat kaT ga.ī hai

tire intizār meñ maiñ jalī ḳhud charāġh ban kar

tirī aarzū meñ aksar yūñhī raat kaT ga.ī hai

na vo ham-ḳhayāl merā na vo ham-mizāj merā

phir usī ke saath kaise ye hayāt kaT ga.ī hai

ye kitāb qismatoñ kī likhī kis qalam ne 'nik.hat'

kahīñ par to shah kaTī hai kahīñ maat kaT ga.ī hai

kahin din guzar gaya hai kahin raat kaT gai hai

ye na puchh kaise tujh bin ye hayat kaT gai hai

ye udas udas mausam ye KHizan KHizan fazaen

wahi zindagi thi jitni tere sath kaT gai hai

na tujhe KHabar hai meri na mujhe KHabar hai teri

teri dastan se jaise meri zat kaT gai hai

ye tera mizaj tauba ye tera ghurur tauba

teri bazm mein hamesha meri baat kaT gai hai

tere intizar mein main jali KHud charagh ban kar

teri aarzu mein aksar yunhi raat kaT gai hai

na wo ham-KHayal mera na wo ham-mizaj mera

phir usi ke sath kaise ye hayat kaT gai hai

ye kitab qismaton ki likhi kis qalam ne 'nikhat'

kahin par to shah kaTi hai kahin mat kaT gai hai