kahin gunah kahin par sawab likhte hain

kahīñ gunāh kahīñ par savāb likhte haiñ

farishte roz hamārā hisāb likhte haiñ

vo likh rahe haiñ agar apnī be-ruḳhī ko bajā

to ham nasīb ko apne ḳharāb likhte haiñ

khulā yahīñ se khulā shahr-e-shādmāñ ham par

tumhāre ġham ko masarrat kā baab likhte haiñ

hazāroñ aañkh meñ chubhte haiñ ḳhaar kī sūrat

tumhāre chehre ko jab bhī gulāb likhte haiñ

yahāñ ke log to ta.abīr jānte hī nahīñ

bas apne niiñd meñ rahne ko ḳhvāb likhte haiñ

fareb khaa.e haiñ ḳhush-manzarī se itne ki ab

chamaktī ret ke uupar sarāb likhte haiñ

haiñ aise log bhī shahr-e-adab meñ jo 'kāshif'

kitāb paḌhte nahīñ haiñ kitāb likhte haiñ

kahin gunah kahin par sawab likhte hain

farishte roz hamara hisab likhte hain

wo likh rahe hain agar apni be-ruKHi ko baja

to hum nasib ko apne KHarab likhte hain

khula yahin se khula shahr-e-shadman hum par

tumhaare gham ko masarrat ka bab likhte hain

hazaron aankh mein chubhte hain KHar ki surat

tumhaare chehre ko jab bhi gulab likhte hain

yahan ke log to tabir jaante hi nahin

bas apne nind mein rahne ko KHwab likhte hain

fareb khae hain KHush-manzari se itne ki ab

chamakti ret ke upar sarab likhte hain

hain aise log bhi shahr-e-adab mein jo 'kashif'

kitab paDhte nahin hain kitab likhte hain