kahin pe qais kahin kohkan miyan likkha

kahīñ pe qais kahīñ kohkan miyāñ likkhā

tumhāre shauq ne kyā kyā kahāñ kahāñ likkhā

likhā tumhīñ ne qafas ko maqām-e-āgāhī

visāl-e-dār kī shab sub.h kī azaañ likkhā

likhā tumhīñ ne lahū se kamāl-e-goyā.ī

tum hī ne ḳhanjar-e-qātil ko hai zabāñ likkhā

likhā tumhīñ ne mirī chashm-e-nam ko qulzum-e-ḳhvāb

tum hī ne us ke tasavvur ko bādbāñ likkhā

tumhīñ ne mauj-e-tamannā ko sar-e-kashīda kahā

tum hī ne ḳhvāhish-e-sāhil ko sargirāñ likkhā

tumhīñ to naqsh-e-kaf-e-pā-e-yār likhte rahe

tum hī ne kūcha-e-jānāñ ko lā-makāñ likkhā

likhā tumhīñ ne hai sahrā ko dāġh-e-sīna-e-ishq

tum hī ne ābla-pā.ī se kahkashāñ likkhā

likhā tumhī ne mirī bebasī kā saarā hisāb

tumhī ne mujh ko shah-e-ḳhusrav-e-zamāñ likhā

to ab tumhāre liye koī kyā likhegā 'ra.īs'

ki jis ne kuchh na kiyā umr-e-rā.egāñ likkhā

kahin pe qais kahin kohkan miyan likkha

tumhaare shauq ne kya kya kahan kahan likkha

likha tumhin ne qafas ko maqam-e-agahi

visal-e-dar ki shab subh ki azan likkha

likha tumhin ne lahu se kamal-e-goyai

tum hi ne KHanjar-e-qatil ko hai zaban likkha

likha tumhin ne meri chashm-e-nam ko qulzum-e-KHwab

tum hi ne us ke tasawwur ko baadban likkha

tumhin ne mauj-e-tamanna ko sar-e-kashida kaha

tum hi ne KHwahish-e-sahil ko sargiran likkha

tumhin to naqsh-e-kaf-e-pa-e-yar likhte rahe

tum hi ne kucha-e-jaanan ko la-makan likkha

likha tumhin ne hai sahra ko dagh-e-sina-e-ishq

tum hi ne aabla-pai se kahkashan likkha

likha tumhi ne meri bebasi ka sara hisab

tumhi ne mujh ko shah-e-KHusraw-e-zaman likha

to ab tumhaare liye koi kya likhega 'rais'

ki jis ne kuchh na kiya umr-e-raegan likkha