kahin pe sarw kahin par gulab KHwabida

kahīñ pe sarv kahīñ par gulāb ḳhvābīda

is āb-o-gil meñ hai kyā iztirāb ḳhvābīda

use chhu.ūñ to mire haath jagmagāte haiñ

hai us badan meñ koī māhtāb ḳhvābīda

uThā hai bistar-e-shab se vo le ke añgḌā.ī

khule haiñ zer-e-qabā pech-o-tāb ḳhvābīda

badan kī oT meñ qaus-e-qamar dhaḌaktī hai

hai kam-sinī meñ tulū'-e-shabāb ḳhvābīda

havā bhī sāhil-e-dariyā pe aa ke ruktī hai

huā hai chāñd bhī pahlū-e-āb ḳhvābīda

thī ḳhāmushī meñ takallum kī ek shīrīnī

ram-e-nafas meñ thā tār-e-rabāb ḳhvābīda

khulī jo aañkh to asrār khul ga.e saare

thā har savāl meñ jaise javāb ḳhvābīda

ye merā dil hai harīm-e-suḳhan ke qadmoñ meñ

hai koī phuul kinār-e-kitāb ḳhvābīda

mujhe gumān ki maiñ huuñ magar nahīñ huuñ maiñ

hai mere chashma-e-jāñ meñ sarāb ḳhvābīda

bas ab to yūñhī paḌe rahiye ḳhvāb-e-ġhaflat meñ

ki jāgne meñ haiñ saare 'azāb ḳhvābīda

use jo dekhūñ maiñ 'sarmad' to dekhtā jā.ūñ

ki jaise ḳhvāb ke andar ho ḳhvāb ḳhvābīda

kahin pe sarw kahin par gulab KHwabida

is aab-o-gil mein hai kya iztirab KHwabida

use chhuun to mere hath jagmagate hain

hai us badan mein koi mahtab KHwabida

uTha hai bistar-e-shab se wo le ke angDai

khule hain zer-e-qaba pech-o-tab KHwabida

badan ki oT mein qaus-e-qamar dhaDakti hai

hai kam-sini mein tulu'-e-shabab KHwabida

hawa bhi sahil-e-dariya pe aa ke rukti hai

hua hai chand bhi pahlu-e-ab KHwabida

thi KHamushi mein takallum ki ek shirini

ram-e-nafas mein tha tar-e-rabab KHwabida

khuli jo aankh to asrar khul gae sare

tha har sawal mein jaise jawab KHwabida

ye mera dil hai harim-e-suKHan ke qadmon mein

hai koi phul kinar-e-kitab KHwabida

mujhe guman ki main hun magar nahin hun main

hai mere chashma-e-jaan mein sarab KHwabida

bas ab to yunhi paDe rahiye KHwab-e-ghaflat mein

ki jagne mein hain sare 'azab KHwabida

use jo dekhun main 'sarmad' to dekhta jaun

ki jaise KHwab ke andar ho KHwab KHwabida