kahin se nile kahin se kale paDe hue hain

kahīñ se niile kahīñ se kaale paḌe hue haiñ

hamāre pairoñ meñ kitne chhāle paḌe hue haiñ

kahīñ to jhuknā paḌegā nān-e-javīñ kī ḳhātir

na jaane kis ke kahāñ nivāle paḌe hue haiñ

vo ḳhush-badan jis galī se guzrā thā us galī meñ

ham aaj bhī apnā dil sambhāle paḌe hue haiñ

hamārī ḳhātir bhī fātiha ho barā.e-baḳhshish

ham āp-apne pe ḳhaak Daale paḌe hue haiñ

shahīd haiñ ham hameñ kabhī raftagāñ na samjho

na jaane kab se ajal ko Taale paḌe hue haiñ

kaho to de deñ ham aaj tum ko hisāb-e-mastī

ki ham ne jitne bhī jaam uchhāle paḌe hue haiñ

hamārī āñkhoñ meñ jab se utrā hai chāñd koī

hamārī āñkhoñ ke gard haale paḌe hue haiñ

abhī to ham ne ye zindagī us ke naam kī hai

abhī to jaañ ke ka.ī izāle paḌe hue haiñ

yaqīñ nahīñ hai ḳhud apne hone kā ham ko varna

ka.ī misāleñ ka.ī havāle paḌe hue haiñ

hamāre kamre meñ us kī yādeñ nahīñ haiñ 'fāzil'

kahīñ kitābeñ kahīñ risāle paḌe hue haiñ

kahin se nile kahin se kale paDe hue hain

hamare pairon mein kitne chhaale paDe hue hain

kahin to jhukna paDega nan-e-jawin ki KHatir

na jaane kis ke kahan niwale paDe hue hain

wo KHush-badan jis gali se guzra tha us gali mein

hum aaj bhi apna dil sambhaale paDe hue hain

hamari KHatir bhi fatiha ho barae-baKHshish

hum aap-apne pe KHak Dale paDe hue hain

shahid hain hum hamein kabhi raftagan na samjho

na jaane kab se ajal ko Tale paDe hue hain

kaho to de den hum aaj tum ko hisab-e-masti

ki hum ne jitne bhi jam uchhaale paDe hue hain

hamari aankhon mein jab se utra hai chand koi

hamari aankhon ke gard haale paDe hue hain

abhi to hum ne ye zindagi us ke nam ki hai

abhi to jaan ke kai izale paDe hue hain

yaqin nahin hai KHud apne hone ka hum ko warna

kai misalen kai hawale paDe hue hain

hamare kamre mein us ki yaaden nahin hain 'fazil'

kahin kitaben kahin risale paDe hue hain