kahin sota na rah jaun sada de kar jagao na

kahīñ sotā na rah jā.ūñ sadā de kar jagāo nā

mujhe in aaTh pahroñ se kabhī bāhar bulāo nā

khulī āñkhoñ se kab tak justujū kā ḳhvāb dekhūñgā

hijāb-e-haft-parda apne chehre se uThāo nā

sitāre par sitāra ok meñ bahtā chalā aa.e

kisī shab kahkashāñ uñDel kar mujh ko pilāo nā

jo chāho to zamāne kā zamāna vāzhgūñ kar do

magar pahle hudūd-e-jāñ meñ hañgāma uThāo nā

subuk-dosh-e-ziyāñ kar diiñ ziyāñ-andeshiyāñ dil kī

zarā asbāb-e-duniyā rāh-e-duniyā meñ luTāo nā

liye jaate haiñ lamhe reza reza kar ke āñkhoñ ko

nihāyat der se maiñ muntazir baiThā huuñ aao nā

kahin sota na rah jaun sada de kar jagao na

mujhe in aaTh pahron se kabhi bahar bulao na

khuli aankhon se kab tak justuju ka KHwab dekhunga

hijab-e-haft-parda apne chehre se uThao na

sitare par sitara ok mein bahta chala aae

kisi shab kahkashan unDel kar mujh ko pilao na

jo chaho to zamane ka zamana wazhgun kar do

magar pahle hudud-e-jaan mein hangama uThao na

subuk-dosh-e-ziyan kar din ziyan-andeshiyan dil ki

zara asbab-e-duniya rah-e-duniya mein luTao na

liye jate hain lamhe reza reza kar ke aankhon ko

nihayat der se main muntazir baiTha hun aao na