kahin suraj kahin zarra chamakta hai

kahīñ sūraj kahīñ zarra chamaktā hai

ishāre se tire kyā kyā chamaktā hai

falak se jab na.ī kirneñ utartī haiñ

guhar sā shabnamī qatra chamaktā hai

use duniyā kabhī dariyā nahīñ kahtī

chamakne ko to har sahrā chamaktā hai

sitāra to sitāra hai mire bhaa.ī

kabhī terā kabhī merā chamaktā hai

mirī mailī hathelī par to bachpan se

ġharībī kā kharā sonā chamaktā hai

mashaqqat kī badaulat hī jabīnoñ par

pasīne kā har ik qatra chamaktā hai

qarīne se tarāshā hī na jaa.e to

kisī pahlū kahāñ hiirā chamaktā hai

ye kyā turfa-tamāsha hai siyāsat kā

kahīñ ḳhanjar kahīñ neza chamaktā hai

tasavvur meñ 'farāġh' āThoñ pahar ab to

koī chehra ġhazal jaisā chamaktā hai

kahin suraj kahin zarra chamakta hai

ishaare se tere kya kya chamakta hai

falak se jab nai kirnen utarti hain

guhar sa shabnami qatra chamakta hai

use duniya kabhi dariya nahin kahti

chamakne ko to har sahra chamakta hai

sitara to sitara hai mere bhai

kabhi tera kabhi mera chamakta hai

meri maili hatheli par to bachpan se

gharibi ka khara sona chamakta hai

mashaqqat ki badaulat hi jabinon par

pasine ka har ek qatra chamakta hai

qarine se tarasha hi na jae to

kisi pahlu kahan hira chamakta hai

ye kya turfa-tamasha hai siyasat ka

kahin KHanjar kahin neza chamakta hai

tasawwur mein 'faragh' aaThon pahar ab to

koi chehra ghazal jaisa chamakta hai