kahin ye taskin-e-dil na dekhi kahin ye aaram-e-jaan na dekha

kahīñ ye taskīn-e-dil na dekhī kahīñ ye ārām-e-jāñ na dekhā

tumhāre dar kī jo ḳhaak paa.ī to ham ne sū-e-jināñ na dekhā

baḌī chamak āftāb meñ thī ajab damak māhtāb meñ thī

uchhāl dī ḳhāk-e-dil jo ham ne kisī ko phir zau-fishāñ na dekhā

agar muqaddar kare na yaarī to farq kyā hai koī jagah ho

chalo vo qaid-e-qafas hī dekhī phuñkā huā āshiyāñ na dekhā

bajā ye farmāyā koī tujh sā gadā mubarram nahīñ jahāñ meñ

huzūr maiñ ne bhī saarī duniyā meñ aap sā mehrbāñ na dekhā

hazār phūloñ meñ dilkashī ho banā.e gulshan hai ḳhār-o-ḳhas par

vo kyā chaman hai ki jis chaman ne nashāt-e-daur-e-ḳhizāñ na dekhā

uchhāl kar kashtī-e-shikasta kināre maujoñ ne pheñk dī hai

baḌā hī shohra thā bahr-e-ġham kā par us ko bhī be-karāñ na dekhā

rukī rukī nabz Dūbtā dil ukhaḌtī sāñseñ bhaTaktī āñkheñ

tumhāre hī dekhne ke qābil thā tum ne hī ye samāñ na dekhā

kabhī purāne ġhamoñ kī sozish kabhī na.ī kashmakash kā khaTkā

dil-e-girafta ko shādmānī meñ bhī kabhī shādmāñ na dekhā

hazār kī tū ne harza-goī magar kahā mudda.ā na dil kā

jo sach kaheñ to zamāne meñ 'kaif' tujh sā bhī be-zabāñ na dekhā

kahin ye taskin-e-dil na dekhi kahin ye aaram-e-jaan na dekha

tumhaare dar ki jo KHak pai to hum ne su-e-jinan na dekha

baDi chamak aaftab mein thi ajab damak mahtab mein thi

uchhaal di KHak-e-dil jo hum ne kisi ko phir zau-fishan na dekha

agar muqaddar kare na yari to farq kya hai koi jagah ho

chalo wo qaid-e-qafas hi dekhi phunka hua aashiyan na dekha

baja ye farmaya koi tujh sa gada mubarram nahin jahan mein

huzur main ne bhi sari duniya mein aap sa mehrban na dekha

hazar phulon mein dilkashi ho banae gulshan hai KHar-o-KHas par

wo kya chaman hai ki jis chaman ne nashat-e-daur-e-KHizan na dekha

uchhaal kar kashti-e-shikasta kinare maujon ne phenk di hai

baDa hi shohra tha bahr-e-gham ka par us ko bhi be-karan na dekha

ruki ruki nabz Dubta dil ukhaDti sansen bhaTakti aankhen

tumhaare hi dekhne ke qabil tha tum ne hi ye saman na dekha

kabhi purane ghamon ki sozish kabhi nai kashmakash ka khaTka

dil-e-girafta ko shadmani mein bhi kabhi shadman na dekha

hazar ki tu ne harza-goi magar kaha muddaa na dil ka

jo sach kahen to zamane mein 'kaif' tujh sa bhi be-zaban na dekha