kahna hai jo bhi kah do yahin mere kan mein

kahnā hai jo bhī kah do yahīñ mere kaan meñ

dekho bulā.iyo na mujhe sā.ebān meñ

ḳhvāboñ kī sīḌhiyoñ pe nazar rakh ke kyā kareñ

rahtī hai ab to yaad bhī ūñche makān meñ

lahje meñ ek baar to shabnam bhī ghol lo

ye kyā ki lai kī baat lahū kī zabān meñ

sūraj kī ḳhud-kushī kā bhī manzar ajiib thā

bikhrā jo dā.eroñ meñ to simTā chaTān meñ

fikr-e-jamīl jaane kahāñ jā ke so ga.ī

ham DhūñDhte haiñ giit ġhazal kī dukān meñ

sāñsoñ se pūchhtī thiiñ yahī lab kī āhaTeñ

ye to batāo kaisā rahā imtihān meñ

aahoñ ke tiir ashk ke neze to ban ga.e

sho'le simaT ke rah ga.e lekin kamān meñ

kahna hai jo bhi kah do yahin mere kan mein

dekho bulaiyo na mujhe saeban mein

KHwabon ki siDhiyon pe nazar rakh ke kya karen

rahti hai ab to yaad bhi unche makan mein

lahje mein ek bar to shabnam bhi ghol lo

ye kya ki lai ki baat lahu ki zaban mein

suraj ki KHud-kushi ka bhi manzar ajib tha

bikhra jo daeron mein to simTa chaTan mein

fikr-e-jamil jaane kahan ja ke so gai

hum DhunDhte hain git ghazal ki dukan mein

sanson se puchhti thin yahi lab ki aahaTen

ye to batao kaisa raha imtihan mein

aahon ke tir ashk ke neze to ban gae

sho'le simaT ke rah gae lekin kaman mein