kahne ko to har baat kahi tere muqabil

kahne ko to har baat kahī tere muqābil

lekin vo fasāna jo mire dil pe raqam hai

mahrūmī kā ehsās mujhe kis liye hotā

hāsil hai jo mujh ko kahāñ duniyā ko baham hai

yā tujh se bichhaḌne kā nahīñ hausla mujh meñ

yā tere taġhāful meñ bhī andāz-e-karam hai

thoḌī sī jagah mujh ko bhī mil jaa.e kahīñ par

vahshat tire kūche meñ mire shahr se kam hai

ai ham-safaro TuuTe na sāñsoñ kā tasalsul

ye qāfila-e-shauq bahut tez-qadam hai

kahne ko to har baat kahi tere muqabil

lekin wo fasana jo mere dil pe raqam hai

mahrumi ka ehsas mujhe kis liye hota

hasil hai jo mujh ko kahan duniya ko baham hai

ya tujh se bichhaDne ka nahin hausla mujh mein

ya tere taghaful mein bhi andaz-e-karam hai

thoDi si jagah mujh ko bhi mil jae kahin par

wahshat tere kuche mein mere shahr se kam hai

ai ham-safaro TuTe na sanson ka tasalsul

ye qafila-e-shauq bahut tez-qadam hai