kaho farar se bandhe na panw mein aankhen

kaho farār se bāñdhe na paañv meñ āñkheñ

qadam qadam pe bichhī haiñ dishāoñ meñ āñkheñ

na jaane kaun sī hogī talāsh kī manzil

bhaTak rahī haiñ abhī tak ḳhalāoñ meñ āñkheñ

karāh uTThī thī sargoshī koī chupke se

lagī thī Thes ki ug aa.iiñ paañv meñ āñkheñ

parinde ab nahīñ manzar guzārne vaale

hazār ḳhvāb sajā.eñ fazāoñ meñ āñkheñ

pahā.diyāñ huī irfān-e-āgahī se bahār

jo mo.atakif huiiñ andhī guphāoñ meñ āñkheñ

bikharte shahroñ ke manzar inheñ dikhāo bhī

umiid se haiñ bahut ab ke gaañv meñ āñkheñ

fazā-nashīn hai tezāb raushnī 'parvez'

nikalte Dartī haiñ ab to havāoñ meñ āñkheñ

kaho farar se bandhe na panw mein aankhen

qadam qadam pe bichhi hain dishaon mein aankhen

na jaane kaun si hogi talash ki manzil

bhaTak rahi hain abhi tak KHalaon mein aankhen

karah uTThi thi sargoshi koi chupke se

lagi thi Thes ki ug aain panw mein aankhen

parinde ab nahin manzar guzarne wale

hazar KHwab sajaen fazaon mein aankhen

pahadiyan hui irfan-e-agahi se bahaar

jo moatakif huin andhi guphaon mein aankhen

bikharte shahron ke manzar inhen dikhao bhi

umid se hain bahut ab ke ganw mein aankhen

faza-nashin hai tezab raushni 'parwez'

nikalte Darti hain ab to hawaon mein aankhen