kahta hai mera azm ki do-gam chala hun

kahtā hai mirā azm ki do-gām chalā huuñ

aur paañv ye kahte haiñ ki sadiyoñ kā thakā huuñ

manzil kā bharam mujh pe ayaañ ho gayā yaaro

behtar hai palaT jā.ūñ jahāñ se maiñ chalā huuñ

dastūr-e-zamāna mujhe apnā.egā kyuuñ kar

maiñ sar se utārī huī beva kī ridā huuñ

sar dhuup meñ duniyā kī chhupānā nahīñ āsāñ

maiñ qad meñ har ik jism ke saa.e se baḌā huuñ

sau baar mirā ḳhuun bahāyā gayā nāhaq

sau baar maiñ ehsās kī suulī pe chaḌhā huuñ

ik 'umr mire dil ko ye ġham yaad rahegā

be-jurm tire shahr ke zindāñ meñ rahā huuñ

jis ghar kī bulandī pe mujhe naaz thā 'kāzim'

maiñ aaj usī ghar kī bulandī se girā huuñ

kahta hai mera azm ki do-gam chala hun

aur panw ye kahte hain ki sadiyon ka thaka hun

manzil ka bharam mujh pe ayan ho gaya yaro

behtar hai palaT jaun jahan se main chala hun

dastur-e-zamana mujhe apnaega kyun kar

main sar se utari hui bewa ki rida hun

sar dhup mein duniya ki chhupana nahin aasan

main qad mein har ek jism ke sae se baDa hun

sau bar mera KHun bahaya gaya nahaq

sau bar main ehsas ki suli pe chaDha hun

ek 'umr mere dil ko ye gham yaad rahega

be-jurm tere shahr ke zindan mein raha hun

jis ghar ki bulandi pe mujhe naz tha 'kazim'

main aaj usi ghar ki bulandi se gira hun