kahte hain sun ke majra mera

kahte haiñ sun ke mājrā merā

tum se kis roz rabt thā merā

nāma-bar us ne to kahā sab kuchh

tū ne bhī haal kuchh kahā merā

ab to ḳhvāhāñ visāl kā bhī nahīñ

kuchh ajab hai muāmla merā

aur kis ko sunāte ho mujh ko

aur kis kā ye zikr thā merā

ye bhī kyā baat aa.ī us din kī

ye bhī kahiye qusūr thā merā

mujh se phir pūchhne se kyā hāsil

gar samajhte ho mudda.ā merā

kuchh kisī baat kā ḳhayāl bhī hai

ġhair ke sāmne gilā merā

dekh kar us kā pherā lenā muñh

aur hasrat se dekhnā merā

kuchh to baa.is hai mere aane kā

kuchh to tum se hai vāstā merā

bevafā kahte haiñ sabhī tum ko

kahiye is meñ qusūr kyā merā

aisī bāteñ to ġhair kī hoñgī

aap ne naam le liyā merā

haal sun ke mirā na ye tū kah

ek hī haal hai tirā merā

be-qarārī se shab kaTī hogī

aisā kis din ḳhayāl thā merā

kis ne betāb kar diyā mujh ko

kaun ārām le gayā merā

dam-e-marg aa ke pūchhte haiñ 'nizām'

ab to baḳhshā kahā sunā merā

kahte hain sun ke majra mera

tum se kis roz rabt tha mera

nama-bar us ne to kaha sab kuchh

tu ne bhi haal kuchh kaha mera

ab to KHwahan visal ka bhi nahin

kuchh ajab hai muamla mera

aur kis ko sunate ho mujh ko

aur kis ka ye zikr tha mera

ye bhi kya baat aai us din ki

ye bhi kahiye qusur tha mera

mujh se phir puchhne se kya hasil

gar samajhte ho muddaa mera

kuchh kisi baat ka KHayal bhi hai

ghair ke samne gila mera

dekh kar us ka phera lena munh

aur hasrat se dekhna mera

kuchh to bais hai mere aane ka

kuchh to tum se hai wasta mera

bewafa kahte hain sabhi tum ko

kahiye is mein qusur kya mera

aisi baaten to ghair ki hongi

aap ne nam le liya mera

haal sun ke mera na ye tu kah

ek hi haal hai tera mera

be-qarari se shab kaTi hogi

aisa kis din KHayal tha mera

kis ne betab kar diya mujh ko

kaun aaram le gaya mera

dam-e-marg aa ke puchhte hain 'nizam'

ab to baKHsha kaha suna mera