kahte hain teri lash pe aaya na jaega

kahte haiñ terī laash pe aayā na jā.egā

to un se ḳhaak meñ bhī milāyā na jā.egā

rahmat pe tujh ko naaz hai isyāñ pe mujh ko naaz

sar tere sāmne to jhukāyā na jā.egā

nazroñ se girne vaale ko kaafī hai ik nazar

kuchh naqsh-e-pā nahīñ ki uThāyā na jā.egā

taklīf kar tabassum-e-pinhāñ se pūchh le

zaḳhm-e-nihāñ ko mujh se dikhāyā na jā.egā

miTtā hai koī hasti-e-mauhūm kā ḳhayāl

vo parda paḌ gayā ki uThāyā na jā.egā

vāraftagī-e-shauq meñ lazzat yahī hai gar

'beḳhud' se apne aap meñ aayā na jā.egā

kahte hain teri lash pe aaya na jaega

to un se KHak mein bhi milaya na jaega

rahmat pe tujh ko naz hai isyan pe mujh ko naz

sar tere samne to jhukaya na jaega

nazron se girne wale ko kafi hai ek nazar

kuchh naqsh-e-pa nahin ki uThaya na jaega

taklif kar tabassum-e-pinhan se puchh le

zaKHm-e-nihan ko mujh se dikhaya na jaega

miTta hai koi hasti-e-mauhum ka KHayal

wo parda paD gaya ki uThaya na jaega

waraftagi-e-shauq mein lazzat yahi hai gar

'beKHud' se apne aap mein aaya na jaega