kahte ho le ke hath mein talwar chup raho

kahte ho le ke haath meñ talvār chup raho

dār-o-rasan pe aao sar-e-dār chup raho

tum kar rahe ho aur mirī nafratoñ ko zikr

tum to sivā ho mujh se gunahgār chup raho

dīvār bhī to gosh-bar-āvāz hai miyāñ

hai maslahat yahī pas-e-dīvār chup raho

guzro ravish-ravish se gulistāñ kī baar baar

dekho guloñ ko sūrat-e-gulzār chup raho

kirdār hai to baat karo bazm meñ zarūr

guftār hai to ġhāzī-e-guftār chup raho

ham ko pata hai ḳhuub tumhārā hai zohd kyā

ai mubtalā-e-taqvā-o-pindār chup raho

zāhir karoge kis pe yahāñ tum rumūz-e-ishq

dil meñ liye huuñ maḳhzan-e-asrār chup raho

hāthoñ ko kuchh uThāo nigāhoñ se kaam lo

yā dil baḌhā ke hausla-bardār chup raho

ġhairat tumhāre naam se sharmā rahī hai aaj

kahte ho apne aap ko ḳhuddār chup raho

koī sharīk-e-dard tumhārā na hogā 'fauq'

dil kā karoge kis se tum iz.hār chup raho

kahte ho le ke hath mein talwar chup raho

dar-o-rasan pe aao sar-e-dar chup raho

tum kar rahe ho aur meri nafraton ko zikr

tum to siwa ho mujh se gunahgar chup raho

diwar bhi to gosh-bar-awaz hai miyan

hai maslahat yahi pas-e-diwar chup raho

guzro rawish-rawish se gulistan ki bar bar

dekho gulon ko surat-e-gulzar chup raho

kirdar hai to baat karo bazm mein zarur

guftar hai to ghazi-e-guftar chup raho

hum ko pata hai KHub tumhaara hai zohd kya

ai mubtala-e-taqwa-o-pindar chup raho

zahir karoge kis pe yahan tum rumuz-e-ishq

dil mein liye hun maKHzan-e-asrar chup raho

hathon ko kuchh uThao nigahon se kaam lo

ya dil baDha ke hausla-bardar chup raho

ghairat tumhaare nam se sharma rahi hai aaj

kahte ho apne aap ko KHuddar chup raho

koi sharik-e-dard tumhaara na hoga 'fauq'

dil ka karoge kis se tum izhaar chup raho