kahte to hain ki hum ko uski talab nahin kuchh

kahte to haiñ ki ham ko us kī talab nahīñ kuchh

par jī usī ko apnā DhūñDe hai Dhab nahīñ kuchh

iḳhlās-o-rabt us se hotā to shor uThāte

lab tishna apne tab haiñ dilbar se jab nahīñ kuchh

yaañ e.atibār kariye jo kuchh vahī hai zāhir

ye kā.enāt apnī āñkhoñ meñ sab nahīñ kuchh

rakh muñh ko gul ke muñh par kyā ġhuncha ho ke so.e

hai shoḳh-chashm shabnam us ko adab nahīñ kuchh

dil ḳhuuñ na hove kyūñkar yaksar varā-e-ulfat

yā sābiqe bahut the yā us se ab nahīñ kuchh

ye haal be-sabab to hotā nahīñ hai lekin

rone kā lamha-lamha zāhir sabab nahīñ kuchh

kar ishq 'mīr' us kā maare kahīñ na jāveñ

jaldī mizāj meñ hai us se ajab nahīñ kuchh

kahte to hain ki hum ko us ki talab nahin kuchh

par ji usi ko apna DhunDe hai Dhab nahin kuchh

iKHlas-o-rabt us se hota to shor uThate

lab tishna apne tab hain dilbar se jab nahin kuchh

yan eatibar kariye jo kuchh wahi hai zahir

ye kaenat apni aankhon mein sab nahin kuchh

rakh munh ko gul ke munh par kya ghuncha ho ke soe

hai shoKH-chashm shabnam us ko adab nahin kuchh

dil KHun na howe kyunkar yaksar wara-e-ulfat

ya sabiqe bahut the ya us se ab nahin kuchh

ye haal be-sabab to hota nahin hai lekin

rone ka lamha-lamha zahir sabab nahin kuchh

kar ishq 'mir' us ka mare kahin na jawen

jaldi mizaj mein hai us se ajab nahin kuchh