kahun ye kaise ki dil ko tera KHayal nahin

kahūñ ye kaise ki dil ko tirā ḳhayāl nahīñ

ye baat aur ki zāhir huā malāl nahīñ

taḌap rahā hai abhī tak ye dil usī ke liye

vo merā ishq hai aur ishq ko zavāl nahīñ

tamām umr sisakte hue hī guzregī

mire nasīb meñ jānāñ tirā visāl nahīñ

sabhī javāb mujhe ḳhāmushī meñ milte haiñ

tumhāre tarz-e-takallum kī bhī misāl nahīñ

to kyā huā jo agar luT gayā bharam merā

ki ek-tarfa mohabbat meñ kuchh kamāl nahīñ

sitam vo laakh kare saath mere haq hai use

mire laboñ pe shikāyat nahīñ savāl nahīñ

kināra ishq se us ke muhāl hai 'ushba'

vo jān-e-jāñ hai mirī jaan kā vabāl nahīñ

kahun ye kaise ki dil ko tera KHayal nahin

ye baat aur ki zahir hua malal nahin

taDap raha hai abhi tak ye dil usi ke liye

wo mera ishq hai aur ishq ko zawal nahin

tamam umr sisakte hue hi guzregi

mere nasib mein jaanan tera visal nahin

sabhi jawab mujhe KHamushi mein milte hain

tumhaare tarz-e-takallum ki bhi misal nahin

to kya hua jo agar luT gaya bharam mera

ki ek-tarfa mohabbat mein kuchh kamal nahin

sitam wo lakh kare sath mere haq hai use

mere labon pe shikayat nahin sawal nahin

kinara ishq se us ke muhaal hai 'ushba'

wo jaan-e-jaan hai meri jaan ka wabaal nahin