kaif-e-sahba se nahin husn tarahdari ka

kaif-e-sahbā se nahīñ husn tarahdārī kā

dūsrā naam javānī bhī hai sarshārī kā

halqa-e-dām-e-siyāsat ḳham-e-gesū-e-butāñ

har taraf daam bichhā dil kī giraftārī kā

shāna-kush reshmī bāloñ ke zarā āhista

kufr puḳhta hai kahāñ aaj kī zunnārī kā

lazzat-e-zaḳhm se āgāh nahīñ thī duniyā

silsila gul se chalā hai jigar-afgārī kā

ashk palkoñ pe sajā lene do ahl-e-ġham ko

in sitāroñ ko bhī mauqa do ziyā-bārī kā

baaz rahiye sar-e-gul-gasht-e-chaman se kab tak

sañg-bārī kā jo mausam vahī gul-bārī kā

shaiḳh ka.abe se koī rañg na le kar uTThe

titliyāñ kar ke tavāf aa.ī haiñ phulvārī kā

bujh ke rah jaatā hai girte hī kisī dāman par

ishq meñ soz-e-jigar chāhiye chiñgārī kā

nīm-bāz āñkheñ laraztī huī palkeñ 'mānī'

jaise ehsās shagūfoñ meñ ho bedārī kā

kaif-e-sahba se nahin husn tarahdari ka

dusra nam jawani bhi hai sarshaari ka

halqa-e-dam-e-siyasat KHam-e-gesu-e-butan

har taraf dam bichha dil ki giraftari ka

shana-kush reshmi baalon ke zara aahista

kufr puKHta hai kahan aaj ki zunnari ka

lazzat-e-zaKHm se aagah nahin thi duniya

silsila gul se chala hai jigar-afgari ka

ashk palkon pe saja lene do ahl-e-gham ko

in sitaron ko bhi mauqa do ziya-bari ka

baz rahiye sar-e-gul-gasht-e-chaman se kab tak

sang-bari ka jo mausam wahi gul-bari ka

shaiKH kabe se koi rang na le kar uTThe

titliyan kar ke tawaf aai hain phulwari ka

bujh ke rah jata hai girte hi kisi daman par

ishq mein soz-e-jigar chahiye chingari ka

nim-baz aankhen larazti hui palken 'mani'

jaise ehsas shagufon mein ho bedari ka