kai aae adawat karne wale

ka.ī aa.e adāvat karne vaale

rahe baaqī mohabbat karne vaale

jiyāle kyoñ nazar aate nahīñ ab

añdheroñ se baġhāvat karne vaale

ujāle sab tire mamnūn hoñge

charāġhoñ kī hifāzat karne vaale

kisī din paḌh leñ fursat se umar ko

zamāne par hukūmat karne vaale

ḳhudā tujh ko sadā rakkhe salāmat

ġharīboñ kī himāyat karne vaale

zarā kirdār un sā bhī to apnā

buzurgoñ kī ziyārat karne vaale

ibādat kā yahī mausam hai 'afzal'

javānī vaqf-e-ishrat karne vaale

javānī husn-e-daulat aur shohrat

parinde haiñ ye hijrat karne vaale

raheñge surḳh-rū donoñ jahāñ meñ

mohammad kī itā.at karne vaale

kai aae adawat karne wale

rahe baqi mohabbat karne wale

jiyale kyon nazar aate nahin ab

andheron se baghawat karne wale

ujale sab tere mamnun honge

charaghon ki hifazat karne wale

kisi din paDh len fursat se umar ko

zamane par hukumat karne wale

KHuda tujh ko sada rakkhe salamat

gharibon ki himayat karne wale

zara kirdar un sa bhi to apna

buzurgon ki ziyarat karne wale

ibaadat ka yahi mausam hai 'afzal'

jawani waqf-e-ishrat karne wale

jawani husn-e-daulat aur shohrat

parinde hain ye hijrat karne wale

rahenge surKH-ru donon jahan mein

mohammad ki itaat karne wale