kai chehre salamat hain kai yaaden salamat hain

ka.ī chehre salāmat haiñ ka.ī yādeñ salāmat haiñ

abhī TuuTe hue dil kī ka.ī kircheñ salāmat haiñ

ḳhayāloñ kī lakīreñ kyoñ adhūre ḳhvāb buntī haiñ

na ab tā'bīr baaqī hai na vo āñkheñ salāmat haiñ

abhī chaspāñ hai mere zehn pe sahrā kā sannāTā

abhī ḳhvāboñ meñ jaltī pyaas kī chīḳheñ salāmat haiñ

bhalā tanhā.ī meñ suunā shajar kis se hañse bole

na ab taa.ir salāmat haiñ na hī shāḳheñ salāmat haiñ

ye hai behtar hudūd-e-vaqt ke bāhar nikal jaa.eñ

yahāñ ab din salāmat haiñ na hī rāteñ salāmat haiñ

musalsal hāfize par vaqt kī choTeñ paḌīñ lekin

tirī ḳhushbū salāmat hai tirī bāteñ salāmat haiñ

abhī inkār kī jur.at dahaktī hai mire dil meñ

abhī tak jism meñ kuchh ḳhuun kī būñdeñ salāmat haiñ

kai chehre salamat hain kai yaaden salamat hain

abhi TuTe hue dil ki kai kirchen salamat hain

KHayalon ki lakiren kyon adhure KHwab bunti hain

na ab ta'bir baqi hai na wo aankhen salamat hain

abhi chaspan hai mere zehn pe sahra ka sannaTa

abhi KHwabon mein jalti pyas ki chiKHen salamat hain

bhala tanhai mein suna shajar kis se hanse bole

na ab tair salamat hain na hi shaKHen salamat hain

ye hai behtar hudud-e-waqt ke bahar nikal jaen

yahan ab din salamat hain na hi raaten salamat hain

musalsal hafize par waqt ki choTen paDin lekin

teri KHushbu salamat hai teri baaten salamat hain

abhi inkar ki jurat dahakti hai mere dil mein

abhi tak jism mein kuchh KHun ki bunden salamat hain