kai dinon se murawwat nahin hui mujhse

ka.ī dinoñ se muravvat nahīñ huī mujh se

use bhī koī shikāyat nahīñ huī mujh se

bahut se kaam dikhāve ke kar rahā thā maiñ

ḳhudā kā shukr ibādat nahīñ huī mujh se

na.e sire se mohabbat kī aarzū thī magar

na.e sire se mohabbat nahīñ huī mujh se

ye log apne aqīde se pyaar karte haiñ

isī liye to aqīdat nahīñ huī mujh se

maiñ zimmedār huuñ terī udaas āñkhoñ kā

maiñ māntā huuñ hifāzat nahīñ huī mujh se

tamām raat yūñhī tīliyāñ jalātā rahā

diyā jalāne kī himmat nahīñ huī mujh se

ye aur baat tujhe darguzar kiyā varna

kisī ke saath ri.āyat nahīñ huī mujh se

kai dinon se murawwat nahin hui mujh se

use bhi koi shikayat nahin hui mujh se

bahut se kaam dikhawe ke kar raha tha main

KHuda ka shukr ibaadat nahin hui mujh se

nae sire se mohabbat ki aarzu thi magar

nae sire se mohabbat nahin hui mujh se

ye log apne aqide se pyar karte hain

isi liye to aqidat nahin hui mujh se

main zimmedar hun teri udas aankhon ka

main manta hun hifazat nahin hui mujh se

tamam raat yunhi tiliyan jalata raha

diya jalane ki himmat nahin hui mujh se

ye aur baat tujhe darguzar kiya warna

kisi ke sath riayat nahin hui mujh se