kaise aankhon mein koi KHwab sunahra pale

kaise āñkhoñ meñ koī ḳhvāb sunahrā paale

pūchh us se jo bhare ghar ko akelā paale

ek hī jast meñ us paar na ho jā.ūñ agar

kahnā duniyā se mire naam kā kuttā paale

tū mirī vaz' nahīñ merī taraf dekh baġhaur

maiñ vo sahrā huuñ ki jis ne ka.ī dariyā paale

kār-e-maqsūm bahar-taur yahī lagtā hai

tifl-e-muflis na pasandīda khilaunā pā le

ġham-e-‘uqbā ġham-e-jānāñ ġham-e-duniyā-dārī

is qadar rog koī kaise ḳhudāyā paale

maiñ samajhtā huuñ suḳhanvar ko yahī zebā hai

dard bhī apne sahe zaḳhm bhī apnā paale

'ain mumkin hai kisī roz 'alī-tāsif' bhī

nāgahāñ ḳhud ko sar-e-rāh dobārā pā le

kaise aankhon mein koi KHwab sunahra pale

puchh us se jo bhare ghar ko akela pale

ek hi jast mein us par na ho jaun agar

kahna duniya se mere nam ka kutta pale

tu meri waz' nahin meri taraf dekh baghaur

main wo sahra hun ki jis ne kai dariya pale

kar-e-maqsum bahar-taur yahi lagta hai

tifl-e-muflis na pasandida khilauna pa le

gham-e-‘uqba gham-e-jaanan gham-e-duniya-dari

is qadar rog koi kaise KHudaya pale

main samajhta hun suKHanwar ko yahi zeba hai

dard bhi apne sahe zaKHm bhi apna pale

'ain mumkin hai kisi roz 'ali-tasif' bhi

nagahan KHud ko sar-e-rah dobara pa le