kaise guzar rahe hain ye din raat kya kahen

kaise guzar rahe haiñ ye din raat kyā kaheñ

mujh se chhupe hue nahīñ hālāt kyā kaheñ

sab chashma-hā-e-chashm bahe phuuT phuuT ke

jis tarah ab ke barsī hai barsāt kyā kaheñ

kyā hādisa thā hijr-e-rafīqāñ batā.eñ kyā

kyā sāneha thā un se mulāqāt kyā kaheñ

tum jaan lo habīb jo mahsūs kar sako

kahne kī bhī nahīñ hai har ik baat kyā kaheñ

rahzan se bach ke nikle to vo āshnā milā

kaisī magar lagā.e hue ghaat kyā kaheñ

apnā sā ho jo madd-e-muqābil to baat ho

tujh se ham ai adū-e-kam-auqāt kyā kaheñ

'shaukat' adab ke naam par maqbūl-e-ām hai

kis kis tarah kā laġhv ḳhurāfāt kyā kaheñ

kaise guzar rahe hain ye din raat kya kahen

mujh se chhupe hue nahin haalat kya kahen

sab chashma-ha-e-chashm bahe phuT phuT ke

jis tarah ab ke barsi hai barsat kya kahen

kya hadisa tha hijr-e-rafiqan bataen kya

kya saneha tha un se mulaqat kya kahen

tum jaan lo habib jo mahsus kar sako

kahne ki bhi nahin hai har ek baat kya kahen

rahzan se bach ke nikle to wo aashna mila

kaisi magar lagae hue ghat kya kahen

apna sa ho jo madd-e-muqabil to baat ho

tujh se hum ai adu-e-kam-auqat kya kahen

'shaukat' adab ke nam par maqbul-e-am hai

kis kis tarah ka laghw KHurafat kya kahen