kaise hain ye insan sanbhal kyon nahin sakte

kaise haiñ ye insān sañbhal kyoñ nahīñ sakte

tadbīr se taqdīr badal kyoñ nahīñ sakte

dushvār bahut marhala-e-shauq hai lekin

girgiT kī tarah rang badal kyoñ nahīñ sakte

mā'lūm to ho ġhota-zan-e-bahr-e-siyāsat

taḳhrīb se tā'mīr meñ Dhal kyoñ nahīñ sakte

nāloñ meñ asar chāhiye tāsīr fuġhāñ meñ

dil laakh hoñ patthar ke pighal kyoñ nahīñ sakte

maanā hai mire yaar riyā-kār-o-ġharaz-mand

yāroñ se magar kaam nikal kyoñ nahīñ sakte

haañ ḳhaam abhī jazba-e-mushtāq hai varna

lamhāt ġham-o-yās ke Tal kyoñ nahīñ sakte

ik baat badalne se agar baat bane hai

dushvār hai kyā baat badal kyoñ nahīñ sakte

nisbat ġham-e-daurāñ se ġham-e-dil ko nahīñ hai

aage ġham-e-daurāñ se nikal kyoñ nahīñ sakte

guftār meñ haiñ tez jo talvār se baḌh kar

kirdār kī bāñhoñ meñ sañbhal kyoñ nahīñ sakte

jazbāt kī tafsīr huuñ patthar to nahīñ huuñ

aañsū mirī āñkhoñ se nikal kyoñ nahīñ sakte

karte haiñ jo pābandī-e-dastūr kī talqīñ

vo sho'la-e-dastūr se jal kyoñ nahīñ sakte

kaise hain ye insan sanbhal kyon nahin sakte

tadbir se taqdir badal kyon nahin sakte

dushwar bahut marhala-e-shauq hai lekin

girgiT ki tarah rang badal kyon nahin sakte

ma'lum to ho ghota-zan-e-bahr-e-siyasat

taKHrib se ta'mir mein Dhal kyon nahin sakte

nalon mein asar chahiye tasir fughan mein

dil lakh hon patthar ke pighal kyon nahin sakte

mana hai mere yar riya-kar-o-gharaz-mand

yaron se magar kaam nikal kyon nahin sakte

han KHam abhi jazba-e-mushtaq hai warna

lamhat gham-o-yas ke Tal kyon nahin sakte

ek baat badalne se agar baat bane hai

dushwar hai kya baat badal kyon nahin sakte

nisbat gham-e-dauran se gham-e-dil ko nahin hai

aage gham-e-dauran se nikal kyon nahin sakte

guftar mein hain tez jo talwar se baDh kar

kirdar ki banhon mein sanbhal kyon nahin sakte

jazbaat ki tafsir hun patthar to nahin hun

aansu meri aankhon se nikal kyon nahin sakte

karte hain jo pabandi-e-dastur ki talqin

wo sho'la-e-dastur se jal kyon nahin sakte