kaise is shahr mein rahna hoga

kaise is shahr meñ rahnā hogā

haa.e vo shaḳhs ki mujh sā hogā

rañg bikhreñge jo maiñ bikhrūñgā

tū jo bikhregā to zarra hogā

ḳhushk āñkhoñ se isī soch meñ huuñ

abr is baar bhī barsā hogā

ab bhī pahroñ hai yahī soch mujhe

vo mujhe chhoḌ ke tanhā hogā

vo badan ḳhvāb sā lagtā hai mujhe

jo kisī ne bhī na dekhā hogā

ye taġhayyur kī havā hai pyāre

ab jahāñ phuul haiñ sahrā hogā

dekhnā tum ki yahī kunj-e-bahār

phir jo guzroge to suunā hogā

na ye chehre na ye mele hoñge

na koī dost kisī kā hogā

aisā badlegā sitamgar mausam

ḳhuun shāḳhoñ se Tapaktā hogā

na kisī sar meñ mohabbat kā junūñ

na kisī dil meñ ye saudā hogā

husn majbūr tah-e-dām-e-havas

ishq mahrūm-e-nazārā hogā

ham ne ghar apnā jalāyā hai ki 'shauq'

shahr meñ kuchh to ujālā hogā

kaise is shahr mein rahna hoga

hae wo shaKHs ki mujh sa hoga

rang bikhrenge jo main bikhrunga

tu jo bikhrega to zarra hoga

KHushk aankhon se isi soch mein hun

abr is bar bhi barsa hoga

ab bhi pahron hai yahi soch mujhe

wo mujhe chhoD ke tanha hoga

wo badan KHwab sa lagta hai mujhe

jo kisi ne bhi na dekha hoga

ye taghayyur ki hawa hai pyare

ab jahan phul hain sahra hoga

dekhna tum ki yahi kunj-e-bahaar

phir jo guzroge to suna hoga

na ye chehre na ye mele honge

na koi dost kisi ka hoga

aisa badlega sitamgar mausam

KHun shaKHon se Tapakta hoga

na kisi sar mein mohabbat ka junun

na kisi dil mein ye sauda hoga

husn majbur tah-e-dam-e-hawas

ishq mahrum-e-nazara hoga

hum ne ghar apna jalaya hai ki 'shauq'

shahr mein kuchh to ujala hoga