kaise kahun safine ko sailab le gaya

kaise kahūñ safīne ko sailāb le gayā

merā nasīb thā jo tah-e-āb le gayā

ik jān-e-ārzū kī tamannā-e-dīd meñ

jaane kahāñ kahāñ dil-e-betāb le gayā

mātam-kunāñ hai shāḳh fazā-e-chaman udaas

ye kaun toḌ kar gul-e-shādāb le gayā

goyā matā-e-dil hī thī merī matā-e-zīst

dil le ke koī ziist ke asbāb le gayā

sūrat dikhā ke ḳhvāb meñ ik aan ke liye

ye kaun zindagī ke hasīñ ḳhvāb le gayā

dil kā qarār dil kā sukūñ dil kī rāhateñ

ye kaun merī ziist ke asbāb le gayā

rindān-e-lucknow ke liye tohfa-e-'umīd'

saaqī sharāb-e-ulfat-e-ahbāb le gayā

kaise kahun safine ko sailab le gaya

mera nasib tha jo tah-e-ab le gaya

ek jaan-e-arzu ki tamanna-e-did mein

jaane kahan kahan dil-e-betab le gaya

matam-kunan hai shaKH faza-e-chaman udas

ye kaun toD kar gul-e-shadab le gaya

goya mata-e-dil hi thi meri mata-e-zist

dil le ke koi zist ke asbab le gaya

surat dikha ke KHwab mein ek aan ke liye

ye kaun zindagi ke hasin KHwab le gaya

dil ka qarar dil ka sukun dil ki rahaten

ye kaun meri zist ke asbab le gaya

rindan-e-lucknow ke liye tohfa-e-'umid'

saqi sharab-e-ulfat-e-ahbab le gaya