kaise kaise mile din ko sae hamein

kaise kaise mile din ko saa.e hameñ

raat ne bhed saare batā.e hameñ

rāz-e-hastī to kyā khul sakegā kabhī

mil ga.e the magar kuchh kinā.e hameñ

gard haiñ kārvān-e-guzishta kī ham

kyā ab āñkhoñ pe koī biThā.e hameñ

saarī dil-dāriyāñ dekh kar so.e haiñ

ab na zanhār koī jagā.e hameñ

naaz jin se hamāre na uTh paa.e the

aaj le jā rahe haiñ uThā.e hameñ

dhuup meñ zindagī kī jale haiñ bahut

le chalo dosto saa.e saa.e hameñ

ik navā thī fazāoñ meñ gum ho ga.ī

ham yahīñ haiñ magar kaun paa.e hameñ

chal diye the 'muhib' chhoḌ kar naav tum

Dūbte dam bahut yaad aa.e hameñ

kaise kaise mile din ko sae hamein

raat ne bhed sare batae hamein

raaz-e-hasti to kya khul sakega kabhi

mil gae the magar kuchh kinae hamein

gard hain karwan-e-guzishta ki hum

kya ab aankhon pe koi biThae hamein

sari dil-dariyan dekh kar soe hain

ab na zanhaar koi jagae hamein

naz jin se hamare na uTh pae the

aaj le ja rahe hain uThae hamein

dhup mein zindagi ki jale hain bahut

le chalo dosto sae sae hamein

ek nawa thi fazaon mein gum ho gai

hum yahin hain magar kaun pae hamein

chal diye the 'muhib' chhoD kar naw tum

Dubte dam bahut yaad aae hamein