kaise kaTe qasida-go harf-garon ke darmiyan

kaise kaTe qasīda-go harf-garoñ ke darmiyāñ

koī to sar-kashīda ho itne saroñ ke darmiyāñ

ek to shaam rañg rañg phir mire ḳhvāb rañg rañg

aag sī hai lagī huī mere paroñ ke darmiyāñ

haath liye haiñ haath meñ phir bhī nazar hai ghaat meñ

ham-safaroñ kī ḳhair ho ham-safaroñ ke darmiyāñ

ab jo chale to ye khulā shahr kushāda ho gayā

baḌh ga.e aur fāsle ghar se gharoñ ke darmiyāñ

kaise uḌuuñ maiñ kyā uḌuuñ jab koī kashmakash sī ho

mere hī bāzuoñ meñ aur mere paroñ ke darmiyāñ

jām-e-sifāl-o-jām-e-jam kuchh bhī to ham na ban sake

aur bikhar bikhar ga.e kūza-garoñ ke darmiyāñ

jaise luTā thā 'shauq' meñ yūñhī matā-e-fan luTī

ahl-e-nazar ke sāmne dīda-varoñ ke darmiyāñ

kaise kaTe qasida-go harf-garon ke darmiyan

koi to sar-kashida ho itne saron ke darmiyan

ek to sham rang rang phir mere KHwab rang rang

aag si hai lagi hui mere paron ke darmiyan

hath liye hain hath mein phir bhi nazar hai ghat mein

ham-safaron ki KHair ho ham-safaron ke darmiyan

ab jo chale to ye khula shahr kushada ho gaya

baDh gae aur fasle ghar se gharon ke darmiyan

kaise uDun main kya uDun jab koi kashmakash si ho

mere hi bazuon mein aur mere paron ke darmiyan

jam-e-sifal-o-jam-e-jam kuchh bhi to hum na ban sake

aur bikhar bikhar gae kuza-garon ke darmiyan

jaise luTa tha 'shauq' mein yunhi mata-e-fan luTi

ahl-e-nazar ke samne dida-waron ke darmiyan