kaise samjhega sadaf ka wo guhar se rishta

kaise samjhegā sadaf kā vo guhar se rishta

jo samajh paa.e na āñkhoñ kā nazar se rishta

mo'atabar sar hī banā lo to bahut achchhā hai

kam hī rah paatā hai dastār kā sar se rishta

hai ġharīboñ kā amīroñ se ta.alluq itnā

jitnā hotā hai charāġhoñ kā sahar se rishta

be-asar jab haiñ zabāneñ to kiyā kyā jaa.e

varna rakhtī haiñ duā.eñ bhī asar se rishta

ham ne rusvā.ī kī us vaqt se chādar oḌhī

jis ghaḌī toḌ diyā thā tire dar se rishta

dil kā rishta bhī agar socho to kyā rishta hai

nibh rahā hai isī rishte ke asar se rishta

justujū us kī ḳhudā jaane hai kis manzil tak

ḳhatm hotā nahīñ 'aḳhtar' kā safar se rishta

kaise samjhega sadaf ka wo guhar se rishta

jo samajh pae na aankhon ka nazar se rishta

mo'atabar sar hi bana lo to bahut achchha hai

kam hi rah pata hai dastar ka sar se rishta

hai gharibon ka amiron se talluq itna

jitna hota hai charaghon ka sahar se rishta

be-asar jab hain zabanen to kiya kya jae

warna rakhti hain duaen bhi asar se rishta

hum ne ruswai ki us waqt se chadar oDhi

jis ghaDi toD diya tha tere dar se rishta

dil ka rishta bhi agar socho to kya rishta hai

nibh raha hai isi rishte ke asar se rishta

justuju us ki KHuda jaane hai kis manzil tak

KHatm hota nahin 'aKHtar' ka safar se rishta