kaise sitam ek jurm-e-mohabbat mein is dil par TuT gae

kaise sitam ik jurm-e-mohabbat meñ is dil par TuuT ga.e

kitne nashtar paar hue aur kitne nashtar TuuT ga.e

ham ne maanā TūTnā dil kā lamhe bhar kī baat sahī

lekin is lamhe meñ ham par lākhoñ mahshar TuuT ga.e

pyaar kā rishta jab na rahā to saarī umangeñ ḳhaak huiiñ

kāñch ke bartan haath se chhūTe farsh pe gir kar TuuT ga.e

dard kī daulat ḳhuun ke aañsū palkoñ tak to pahuñche the

is se aage luT ga.ī daulat saare gauhar TuuT ga.e

jab tak thī parvāz kī tāqat uḌte hue Dar lagtā thā

jis dam himmat dil meñ aa.ī donoñ shahpar TuuT ga.e

kaise sitam ek jurm-e-mohabbat mein is dil par TuT gae

kitne nashtar par hue aur kitne nashtar TuT gae

hum ne mana TuTna dil ka lamhe bhar ki baat sahi

lekin is lamhe mein hum par lakhon mahshar TuT gae

pyar ka rishta jab na raha to sari umangen KHak huin

kanch ke bartan hath se chhuTe farsh pe gir kar TuT gae

dard ki daulat KHun ke aansu palkon tak to pahunche the

is se aage luT gai daulat sare gauhar TuT gae

jab tak thi parwaz ki taqat uDte hue Dar lagta tha

jis dam himmat dil mein aai donon shahpar TuT gae