kaisi ye afsurdagi hai aaj-kal

kaisī ye afsurdagī hai āj-kal

zindagī meñ kuchh kamī hai āj-kal

chāñd kī āvārgī se chāñdnī

sog meñ Duubī huī hai āj-kal

chal banā.eñ āshiyāñ us paar ham

raat mujh se kah rahī hai āj-kal

kyā sabab hai dhuup hai sahmī huī

pattharoñ par bhī namī hai āj-kal

taḌpannoñ meñ haiñ ġhazab bechainiyāñ

detā is had tishnagī hai āj-kal

jī rahā huuñ maut kī ḳhvāhish liye

ziist merī dīdanī hai āj-kal

vo sharāfat jo kabhī anmol thī

kauḌiyoñ meñ bik rahī hai āj-kal

zulmatoñ kā daur bhī ye kab talak

raushnī bhī mar rahī hai āj-kal

ziist kī majbūriyāñ mat pūchhiye

saath mere chal rahī hai āj-kal

aa rahī hai phir chunāv kī ḳhabar

shahr bhar meñ ḳhāmushī hai āj-kal

kaun ab vāqif hai apne aap se

aadmī kab aadmī hai āj-kal

kaisi ye afsurdagi hai aaj-kal

zindagi mein kuchh kami hai aaj-kal

chand ki aawargi se chandni

sog mein Dubi hui hai aaj-kal

chal banaen aashiyan us par hum

raat mujh se kah rahi hai aaj-kal

kya sabab hai dhup hai sahmi hui

pattharon par bhi nami hai aaj-kal

taDpannon mein hain ghazab bechainiyan

deta is had tishnagi hai aaj-kal

ji raha hun maut ki KHwahish liye

zist meri didani hai aaj-kal

wo sharafat jo kabhi anmol thi

kauDiyon mein bik rahi hai aaj-kal

zulmaton ka daur bhi ye kab talak

raushni bhi mar rahi hai aaj-kal

zist ki majburiyan mat puchhiye

sath mere chal rahi hai aaj-kal

aa rahi hai phir chunaw ki KHabar

shahr bhar mein KHamushi hai aaj-kal

kaun ab waqif hai apne aap se

aadmi kab aadmi hai aaj-kal