kal bare humse is se mulaqat ho gai

kal baare ham se is se mulāqāt ho ga.ī

do do bachan ke hone meñ ik baat ho ga.ī

kin kin musībatoñ se huī sub.h shām-e-hijr

so zulfeñ hī banāte use raat ho ga.ī

gardish nigāh-e-mast kī mauqūf sāqiyā

masjid to shaiḳh jī kī ḳharābāt ho ga.ī

Dar zulm se ki us kī jazā bas shitāb hai

aayā ‘amal meñ yaañ ki mukāfāt ho ga.ī

ḳhurshīd sā pyāla-e-mai be-talab diyā

pīr-e-muġhāñ se raat karāmāt ho ga.ī

kitnā ḳhilāf vā'da huā hogā vo ki yaañ

nau-mīdī-o-umīd musāvāt ho ga.ī

aa shaiḳh guftagū-e-pareshāñ pe to na jā

mastī meñ ab to qibla-e-hājāt ho ga.ī

Tak shahr se nikal ke mirā girya sair kar

goyā ki koh-o-dasht pe barsāt ho ga.ī

dīdār kī gursañgī apnī yahīñ se dekh

ik hī nigāh yāroñ kī auqāt ho ga.ī

apne to hoñT bhī na hile us ke rū-ba-rū

ranjish kī vaj.h 'mīr' vo kyā baat ho ga.ī

kal bare hum se is se mulaqat ho gai

do do bachan ke hone mein ek baat ho gai

kin kin musibaton se hui subh sham-e-hijr

so zulfen hi banate use raat ho gai

gardish nigah-e-mast ki mauquf saqiya

masjid to shaiKH ji ki KHarabaat ho gai

Dar zulm se ki us ki jaza bas shitab hai

aaya ‘amal mein yan ki mukafat ho gai

KHurshid sa pyala-e-mai be-talab diya

pir-e-mughan se raat karamat ho gai

kitna KHilaf wa'da hua hoga wo ki yan

nau-midi-o-umid musawat ho gai

aa shaiKH guftagu-e-pareshan pe to na ja

masti mein ab to qibla-e-hajat ho gai

Tak shahr se nikal ke mera girya sair kar

goya ki koh-o-dasht pe barsat ho gai

didar ki gursangi apni yahin se dekh

ek hi nigah yaron ki auqat ho gai

apne to honT bhi na hile us ke ru-ba-ru

ranjish ki wajh 'mir' wo kya baat ho gai