kal raat teri yaad ko humne biThaya aur bas

kal raat terī yaad ko ham ne biThāyā aur bas

takte rahe mahtāb ko kuchh yaad aayā aur bas

shikve ka.ī the the ka.ī ham ko gile us ne magar

milte hī yuuñ ma.asūmiyat se muskurāyā aur bas

peshāniyoñ par thī shikan ġhusse se yuuñ sab laal the

phir ek dam us ne nazar ko yuuñ jhukāyā aur bas

dekhā jo us ne hijr ko ik roz apne ḳhvāb meñ

jhuñjhlā uThe phir niiñd se ham ko jagāyā aur bas

ai yaar jab tak thī nahīñ be-pardagī sab Thiik thā

us ne yakāyak chehre se chehra haTāyā aur bas

tum jo ga.e the haath yuuñ ham se chhuḌā kar kyā kaheñ

band siina meñ jo thā parinda phaḌphaḌāyā aur bas

apne kalāmoñ kā sabab ab ham batā.eñ bhī to kyā

ik roz 'hāmid' un se thā yuuñ dil lagāyā aur bas

kal raat teri yaad ko hum ne biThaya aur bas

takte rahe mahtab ko kuchh yaad aaya aur bas

shikwe kai the the kai hum ko gile us ne magar

milte hi yun masumiyat se muskuraya aur bas

peshaniyon par thi shikan ghusse se yun sab lal the

phir ek dam us ne nazar ko yun jhukaya aur bas

dekha jo us ne hijr ko ek roz apne KHwab mein

jhunjhla uThe phir nind se hum ko jagaya aur bas

ai yar jab tak thi nahin be-pardagi sab Thik tha

us ne yakayak chehre se chehra haTaya aur bas

tum jo gae the hath yun hum se chhuDa kar kya kahen

band sina mein jo tha parinda phaDphaDaya aur bas

apne kalamon ka sabab ab hum bataen bhi to kya

ek roz 'hamid' un se tha yun dil lagaya aur bas