kaliyon pe shabab aae phulon pe nikhaar aae

kaliyoñ pe shabāb aa.e phūloñ pe nikhār aa.e

ik aap ke aane se gulshan meñ bahār aa.e

ye kaisī adāvat hai ye kaisī mohabbat hai

tum se hī gile shikve aur tum pe hī pyaar aa.e

aane kī ḳhabar de kar aa.e na abhī tak vo

aa jaa.eñ to shāyad phir is dil ko qarār aa.e

mahfil meñ raqīboñ kī vo jaate haiñ ḳhush ho kar

kahte haiñ mohabbat kā ham qarz utaar aa.e

is dast-e-mubārak se taskīn nahīñ hotī

āñkhoñ se pilā saaqī tab jā ke ḳhumār aa.e

gulshan ko lahū de kar sīñchā hai 'samar' maiñ ne

lekin mire hisse meñ bas ḳhaar hī ḳhaar aa.e

kaliyon pe shabab aae phulon pe nikhaar aae

ek aap ke aane se gulshan mein bahaar aae

ye kaisi adawat hai ye kaisi mohabbat hai

tum se hi gile shikwe aur tum pe hi pyar aae

aane ki KHabar de kar aae na abhi tak wo

aa jaen to shayad phir is dil ko qarar aae

mahfil mein raqibon ki wo jate hain KHush ho kar

kahte hain mohabbat ka hum qarz utar aae

is dast-e-mubarak se taskin nahin hoti

aankhon se pila saqi tab ja ke KHumar aae

gulshan ko lahu de kar sincha hai 'samar' main ne

lekin mere hisse mein bas KHar hi KHar aae