kam mayassar ho jo hoti hai usi ki qimat

kam mayassar ho jo hotī hai usī kī qīmat

kasrat-e-ġham ne baḌhā.ī hai ḳhushī kī qīmat

pairvī-e-dil-e-nādāñ kā salīqa hai jinheñ

un se pūchhe koī be-rāh-ravī kī qīmat

tum ne hañste mujhe dekhā hai tumheñ kyā mālūm

karnī paḌtī hai adā kitnī hañsī kī qīmat

ehtirām apnā hī ḳhud jis kī nigāhoñ meñ na ho

kyā bhalā us kī nigāhoñ meñ kisī kī qīmat

mujh se dhokā to huā dil ko magar mauj-e-sarāb

mil ga.ī mujh ko mirī tishna-labī kī qīmat

mere siine meñ chhupe zaḳhm batā.eñge 'ra.īs'

maiñ ne jo kī hai adā zinda-dilī kī qīmat

kam mayassar ho jo hoti hai usi ki qimat

kasrat-e-gham ne baDhai hai KHushi ki qimat

pairwi-e-dil-e-nadan ka saliqa hai jinhen

un se puchhe koi be-rah-rawi ki qimat

tum ne hanste mujhe dekha hai tumhein kya malum

karni paDti hai ada kitni hansi ki qimat

ehtiram apna hi KHud jis ki nigahon mein na ho

kya bhala us ki nigahon mein kisi ki qimat

mujh se dhoka to hua dil ko magar mauj-e-sarab

mil gai mujh ko meri tishna-labi ki qimat

mere sine mein chhupe zaKHm bataenge 'rais'

main ne jo ki hai ada zinda-dili ki qimat