kamal-e-hosh hai jinko wo diwane se lagte hain

kamāl-e-hosh hai jin ko vo dīvāne se lagte haiñ

haqā.eq zindagī ke aaj afsāne se lagte haiñ

sab apne haiñ ba-zāhir jaane pahchāne se lagte haiñ

koī vaqt aa paḌe to saaf begāne se lagte haiñ

sharāfat ke libāde jab utar jaate haiñ jismoñ se

to ye gunjān shahr ābād vīrāne se lagte haiñ

bahāroñ meñ bhī gulshan kī udāsī kyoñ nahīñ jaatī

yahāñ kuchh soḳhta-jānoñ ke kāshāne se lagte haiñ

banā.e jaate haiñ insāniyat-sozī ke mansūbe

yahī ā.īna-ḳhāne ma.asiyat-ḳhāne se lagte haiñ

shu.ūr-e-zindagānī tarbiyat paatā hai sadmoñ se

havādis hausla-mandoñ ke nazrāne se lagte haiñ

bikharte TūTte ḳhvāboñ ko dil se kyā lagā rakheñ

ye aise zaḳhm haiñ jo zaḳhm bhar jaane se lagte haiñ

adā-e-sādgī bhī ek fankārī hai 'shauq' un kī

vo sab kuchh jānte haiñ lekin anjāne se lagte haiñ

kamal-e-hosh hai jin ko wo diwane se lagte hain

haqaeq zindagi ke aaj afsane se lagte hain

sab apne hain ba-zahir jaane pahchane se lagte hain

koi waqt aa paDe to saf begane se lagte hain

sharafat ke libaade jab utar jate hain jismon se

to ye gunjaan shahr aabaad virane se lagte hain

bahaaron mein bhi gulshan ki udasi kyon nahin jati

yahan kuchh soKHta-jaanon ke kashane se lagte hain

banae jate hain insaniyat-sozi ke mansube

yahi aaina-KHane masiyat-KHane se lagte hain

shuur-e-zindagani tarbiyat pata hai sadmon se

hawadis hausla-mandon ke nazrane se lagte hain

bikharte TuTte KHwabon ko dil se kya laga rakhen

ye aise zaKHm hain jo zaKHm bhar jaane se lagte hain

ada-e-sadgi bhi ek fankari hai 'shauq' un ki

wo sab kuchh jaante hain lekin anjaane se lagte hain