kar lete alag hum to dil is shoKH se kab ka

kar lete alag ham to dil is shoḳh se kab kā

gar aur bhī hotā koī is taur kī chhab kā

bosa kī evaz hote haiñ dushnām se masrūr

itnā to karam ham pe bhī hai yaar ke lab kā

us kaan ke jhumke kī laTak dekh lī shāyad

har ḳhosha isī taak meñ rahtā hai enab kā

dekhā jo baḌī der talak us ne muñh apnā

le dast-e-hinā-basta meñ ā.īna halab kā

jab ham ne kahā rakhiye ab ā.īna ko ye to

hissa hai kisī aur bhī dīdār-talab kā

ye sun ke udhar us ne kiyā ġhusse meñ muñh surḳh

bhabkā idhar ā.īna bhī ham-sar ho ġhazab kā

tum rabt ke Dhab jis se laḌāte ho 'nazīr' aah

vo dilbar-e-ayyār hai kuchh aur hī Dhab kā

kar lete alag hum to dil is shoKH se kab ka

gar aur bhi hota koi is taur ki chhab ka

bosa ki ewaz hote hain dushnam se masrur

itna to karam hum pe bhi hai yar ke lab ka

us kan ke jhumke ki laTak dekh li shayad

har KHosha isi tak mein rahta hai enab ka

dekha jo baDi der talak us ne munh apna

le dast-e-hina-basta mein aaina halab ka

jab hum ne kaha rakhiye ab aaina ko ye to

hissa hai kisi aur bhi didar-talab ka

ye sun ke udhar us ne kiya ghusse mein munh surKH

bhabka idhar aaina bhi ham-sar ho ghazab ka

tum rabt ke Dhab jis se laDate ho 'nazir' aah

wo dilbar-e-ayyar hai kuchh aur hi Dhab ka