kar na le apna Thikana dushman

kar na le apnā Thikāna dushman

dost nādān hai daanā dushman

dekhe gar us kī palak yā-allāh

to ho tīroñ kā nishāna dushman

dīda-e-tar na bahānā aañsū

DhūñDhte haiñ ye bahāna dushman

dost ko dost na samjhā tum ne

aur dushman ko na jaanā dushman

dostī kī na rahe phir ummīd

kaash ho jaa.e zamāna dushman

dushman-e-jāñ haiñ bahut par ai ishq

tujhe jaanā tujhe maanā dushman

tum samajhte ho use yār-e-qadīm

dil hai ai 'dāġh' purānā dushman

kar na le apna Thikana dushman

dost nadan hai dana dushman

dekhe gar us ki palak ya-allah

to ho tiron ka nishana dushman

dida-e-tar na bahana aansu

DhunDhte hain ye bahana dushman

dost ko dost na samjha tum ne

aur dushman ko na jaana dushman

dosti ki na rahe phir ummid

kash ho jae zamana dushman

dushman-e-jaan hain bahut par ai ishq

tujhe jaana tujhe mana dushman

tum samajhte ho use yar-e-qadim

dil hai ai 'dagh' purana dushman