karam nahin to sitam hi sahi rawa rakhna

karam nahīñ to sitam hī sahī ravā rakhnā

ta.alluqāt vo jaise bhī hoñ sadā rakhnā

kuchh is tarah kī hidāyat milī hai ab ke mujhe

ki sar pe qahr bhī TūTeñ to dil baḌā rakhnā

na āñsuoñ kī ravāñ nahr aañkh se karnā

ab us kī yaad bhī aa.e to hausla rakhnā

kise milā hai milegā kise murād kā phal

so ġhā.ebāna navāzish kī aas kyā rakhnā

ajab nahīñ ki varūd-e-habīb ho jaa.e

zamāna tañg-nazar hai to dil khulā rakhnā

jo dostī ke liye be-qarār rahtā hai

vo koī chaal na chal jaa.e phir patā rakhnā

sitāra arsh se TūTegā ek farsh kī samt

tum apnā ghar dar-o-dīvār tak sajā rakhnā

vafā-shi.ār bhī qudrat thā rūThne vaalā

ravāyatan bhī na naam is kā bevafā rakhnā

karam nahin to sitam hi sahi rawa rakhna

talluqat wo jaise bhi hon sada rakhna

kuchh is tarah ki hidayat mili hai ab ke mujhe

ki sar pe qahr bhi TuTen to dil baDa rakhna

na aansuon ki rawan nahr aankh se karna

ab us ki yaad bhi aae to hausla rakhna

kise mila hai milega kise murad ka phal

so ghaebana nawazish ki aas kya rakhna

ajab nahin ki warud-e-habib ho jae

zamana tang-nazar hai to dil khula rakhna

jo dosti ke liye be-qarar rahta hai

wo koi chaal na chal jae phir pata rakhna

sitara arsh se TuTega ek farsh ki samt

tum apna ghar dar-o-diwar tak saja rakhna

wafa-shiar bhi qudrat tha ruThne wala

rawayatan bhi na nam is ka bewafa rakhna