karb dar-parda-e-tarab hai abhi

karb dar-parda-e-tarab hai abhī

muskurāhaT bhī zer-e-lab hai abhī

haiñ pareshāñ hayāt ke gesū

na karo zikr-e-sub.h shab hai abhī

mil to saktā hai aadmī meñ ḳhudā

aadmī aadmī hī kab hai abhī

laakh samjhaute haal se kījiye

thī ġhazab yaad ik ġhazab hai abhī

kis qadar kāmyāb hai insāñ

bhuuk hī maut kā sabab hai abhī

zindagī tishnagī meñ thī sarshār

ho ke sarshār tishna-lab hai abhī

bazm-e-imkāñ hai juzv-e-fikr-o-nazar

aql-e-kul aql-e-bul-ajab hai abhī

ik havas hai ki qahqaha parvāz

ik mohabbat ki jāñ-ba-lab hai abhī

miT ga.e fāsle ḳhalāoñ ke

rañg hai nasl hai nasab hai abhī

ḳhud-numā.ī ke vahm kā ib.hām

naam ke saath ik laqab hai abhī

tul rahī hai hayāt hāthoñ par

fā.elun fā.elun adab hai abhī

sab jo paayā hai aaj kuchh bhī nahīñ

kuchh jo khoyā thā kal vo sab hai abhī

ghar ke Tiksāl kī mashīnoñ meñ

dil kā vo shor vo shaġhab hai abhī

har nazar ik savāl hai 'āmir'

har nafas faisla-talab hai abhī

karb dar-parda-e-tarab hai abhi

muskurahaT bhi zer-e-lab hai abhi

hain pareshan hayat ke gesu

na karo zikr-e-subh shab hai abhi

mil to sakta hai aadmi mein KHuda

aadmi aadmi hi kab hai abhi

lakh samjhaute haal se kijiye

thi ghazab yaad ek ghazab hai abhi

kis qadar kaamyab hai insan

bhuk hi maut ka sabab hai abhi

zindagi tishnagi mein thi sarshaar

ho ke sarshaar tishna-lab hai abhi

bazm-e-imkan hai juzw-e-fikr-o-nazar

aql-e-kul aql-e-bul-ajab hai abhi

ek hawas hai ki qahqaha parwaz

ek mohabbat ki jaan-ba-lab hai abhi

miT gae fasle KHalaon ke

rang hai nasl hai nasab hai abhi

KHud-numai ke wahm ka ibham

nam ke sath ek laqab hai abhi

tul rahi hai hayat hathon par

faelun faelun adab hai abhi

sab jo paya hai aaj kuchh bhi nahin

kuchh jo khoya tha kal wo sab hai abhi

ghar ke Tiksal ki mashinon mein

dil ka wo shor wo shaghab hai abhi

har nazar ek sawal hai 'amir'

har nafas faisla-talab hai abhi