karb-e-hasti yun chhupana chahiye

karb-e-hastī yuuñ chhupānā chāhiye

ashk pī kar muskurānā chāhiye

mustaqil hañsne kī aadat Daal kar

jalne vāloñ ko jalānā chāhiye

aap munsif haiñ to kar deñ faisla

kyā kisī kā dil dukhānā chāhiye

haal par jab bojh ban jaa.e to phir

apnā maazī bhuul jaanā chāhiye

kar ke iz.hār-e-tamannā phir koī

dostoñ ko āzmānā chāhiye

bil-yaqīñ aahoñ meñ hotā hai asar

lekin is ko ik zamāna chāhiye

nit-na.e ilzām sar rakh kar mire

qatl kā mere bahānā chāhiye

sabr ik achchhī alāmat hai magar

zulm se panja laḌānā chāhiye

baar haiñ jis par faqat makr-o-fareb

aisī kashtī Duub jaanā chāhiye

maslahat kī zulm ne pahnī naqāb

ruḳh se ye parda haTānā chāhiye

manziloñ kī gar hai tum ko justujū

ḳhvāb palkoñ par sajānā chāhiye

pattharoñ kā shahr hai 'bebāk' ye

ab alag bastī basānā chāhiye

karb-e-hasti yun chhupana chahiye

ashk pi kar muskurana chahiye

mustaqil hansne ki aadat Dal kar

jalne walon ko jalana chahiye

aap munsif hain to kar den faisla

kya kisi ka dil dukhana chahiye

haal par jab bojh ban jae to phir

apna mazi bhul jaana chahiye

kar ke izhaar-e-tamanna phir koi

doston ko aazmana chahiye

bil-yaqin aahon mein hota hai asar

lekin is ko ek zamana chahiye

nit-nae ilzam sar rakh kar mere

qatl ka mere bahana chahiye

sabr ek achchhi alamat hai magar

zulm se panja laDana chahiye

bar hain jis par faqat makr-o-fareb

aisi kashti Dub jaana chahiye

maslahat ki zulm ne pahni naqab

ruKH se ye parda haTana chahiye

manzilon ki gar hai tum ko justuju

KHwab palkon par sajaana chahiye

pattharon ka shahr hai 'bebak' ye

ab alag basti basana chahiye