karb-e-taKHliq ka chhaya raha manzar mujh par

karb-e-taḳhlīq kā chhāyā rahā manzar mujh par

āyat-e-ishq utartī rahī shab bhar mujh par

ek saa.at ko bhulāyā thā ġham-e-ishq abhī

band hone lagā taḳhlīq kā har dar mujh par

jāgte vaqt vahī shaḳhs labāda thā mirā

nīm-shab ko jo utārā gayā paikar mujh par

chiil kavvoñ kī tarah khā ga.e rishte mere

phir bhī ilzām dharā jaatā hai mujh par mujh par

ḳhalq ne nāvak-e-dushnām se chhalnī kar ke

jabr ke tiir chalā.e haiñ barābar mujh par

shaam hote hī udāsī kī havā chaltī hai

TuuT paḌtā hai ḳhayālāt kā lashkar mujh par

jab kabhī merī tavajjoh meñ ḳhalal aatā hai

phūñk detā hai koī ishq kā mantar mujh par

'ābdī' ishq adāvat hai kahā thā ik din

aks merā hī chalāne lagā ḳhanjar mujh par

karb-e-taKHliq ka chhaya raha manzar mujh par

aayat-e-ishq utarti rahi shab bhar mujh par

ek saat ko bhulaya tha gham-e-ishq abhi

band hone laga taKHliq ka har dar mujh par

jagte waqt wahi shaKHs labaada tha mera

nim-shab ko jo utara gaya paikar mujh par

chil kawwon ki tarah kha gae rishte mere

phir bhi ilzam dhara jata hai mujh par mujh par

KHalq ne nawak-e-dushnam se chhalni kar ke

jabr ke tir chalae hain barabar mujh par

sham hote hi udasi ki hawa chalti hai

TuT paDta hai KHayalat ka lashkar mujh par

jab kabhi meri tawajjoh mein KHalal aata hai

phunk deta hai koi ishq ka mantar mujh par

'abdi' ishq adawat hai kaha tha ek din

aks mera hi chalane laga KHanjar mujh par