karb wahshat uljhanen aur itni tanhai ki bas

karb vahshat uljhaneñ aur itnī tanhā.ī ki bas

jaane kyuuñ taqdīr ne lī aisī añgḌā.ī ki bas

jab kabhī bhūle se bhī ā.īna dekhā tere ba.ad

apnī hī sūrat meñ vo sūrat nazar aa.ī ki bas

toḌne jab bhī chalā zindān-e-āb-o-gil ko maiñ

jānī-pahchānī huī āvāz ik aa.ī ki bas

chilchilātī dhuup ġham kī hādsoñ ke sā.ebāñ

soch kā taptā ye sahrā aur ye purvā.ī ki bas

kaash nā-bīnā hī rahtā is muqār-ḳhāna meñ

tohfatan duniyā ne dī hai aisī bīnā.ī ki bas

nochtī kab tak raheñgī yuuñ barahna ḳhvāhisheñ

tā-ba-kai hotī rahegī aisī rusvā.ī ki bas

maiñ huuñ ai 'hamdūn' ik zinda giraftār-e-lahad

apnī hī taqdīr se Thokar vo hai khaa.ī ki bas

karb wahshat uljhanen aur itni tanhai ki bas

jaane kyun taqdir ne li aisi angDai ki bas

jab kabhi bhule se bhi aaina dekha tere baad

apni hi surat mein wo surat nazar aai ki bas

toDne jab bhi chala zindan-e-ab-o-gil ko main

jaani-pahchani hui aawaz ek aai ki bas

chilchilati dhup gham ki hadson ke saeban

soch ka tapta ye sahra aur ye purwai ki bas

kash na-bina hi rahta is muqar-KHana mein

tohfatan duniya ne di hai aisi binai ki bas

nochti kab tak rahengi yun barahna KHwahishen

ta-ba-kai hoti rahegi aisi ruswai ki bas

main hun ai 'hamdun' ek zinda giraftar-e-lahad

apni hi taqdir se Thokar wo hai khai ki bas