kare aashiq pe wo bedad jitna us ka ji chahe

kare āshiq pe vo bedād jitnā us kā jī chāhe

rakhe dil ko mire nāshād jitnā us kā jī chāhe

hameñ bhī sabr ḳhātir-ḳhvāh dād-e-haq hai ulfat meñ

vo de jaur o jafā kī daad jitnā us kā jī chāhe

ye mazlūm-e-mohabbat dād-ras hargiz na pāvegā

kare dil-dād aur fariyād jitnā us kā jī chāhe

adam hai aur vajūd us musht-e-par kā bhī masāvī sā

sitam ham par kare sayyād jitnā us kā jī chāhe

balā-e-nā-gahāñ girya giraftārī nahīñ ġhāfil

vo ho ġham se mire āzād jitnā us kā jī chāhe

nahīñ hai sarnavisht us kī lab-e-jāñ-baḳhsh-shīrīñ kī

kare jāñ-kandanī farhād jitnā us kā jī chāhe

hameñ 'hasrat' farāmoshī bhī us kī yādgārī hai

kare go ham ko kam-tar yaad jitnā us kā jī chāhe

kare aashiq pe wo bedad jitna us ka ji chahe

rakhe dil ko mere nashad jitna us ka ji chahe

hamein bhi sabr KHatir-KHwah dad-e-haq hai ulfat mein

wo de jaur o jafa ki dad jitna us ka ji chahe

ye mazlum-e-mohabbat dad-ras hargiz na pawega

kare dil-dad aur fariyaad jitna us ka ji chahe

adam hai aur wajud us musht-e-par ka bhi masawi sa

sitam hum par kare sayyaad jitna us ka ji chahe

bala-e-na-gahan girya giraftari nahin ghafil

wo ho gham se mere aazad jitna us ka ji chahe

nahin hai sarnawisht us ki lab-e-jaan-baKHsh-shirin ki

kare jaan-kandani farhad jitna us ka ji chahe

hamein 'hasrat' faramoshi bhi us ki yaadgari hai

kare go hum ko kam-tar yaad jitna us ka ji chahe