karega apni baaton par malal aahista-ahista

karegā apnī bātoñ par malāl āhista-āhista

paḌegā raushnī kā us ko kaal āhista-āhista

na un ko koī ujlat hai na koī kār-e-duniyā hai

dikhā apne faqīroñ ko jamāl āhista-āhista

muḳhālif saf meñ merā yaar mujh se laḌne aaya hai

uThā.ūñgā magar apnī maiñ Dhaal āhista-āhista

kabhī yakjā nahīñ hote diloñ ko toḌne vaale

badal jaate haiñ un ke ḳhadd-o-ḳhāl āhista-āhista

maiñ apne hijr ko nigrāñ banā kar lauT aaya thā

bunā hai makḌiyoñ ne zard jaal āhista-āhista

ye maiñ logoñ ke dil meñ ghar jo kar letā huuñ ujlat meñ

huā hai mujh ko hāsil ye kamāl āhista-āhista

ye kār-e-ishq hai aur is meñ sab ghar-bār luTtā hai

bichhaḌte haiñ idhar ahl-o-ayāl āhista-āhista

mire ghar meñ ġhamoñ kī aaj phir bārāt aa.egī

kareñgī dhaḌkaneñ im-shab dhamāl āhista-āhista

mirī raftār kī koī yahāñ pe had na hotī thī

kiyā hai ishq ne mujh ko niDhāl āhista-āhista

zabāñ ke zaḳhm 'mustahsan' kisī ko bhūlte kab haiñ

utartī hai daraḳhtoñ se ye chhāl āhista-āhista

karega apni baaton par malal aahista-ahista

paDega raushni ka us ko kal aahista-ahista

na un ko koi ujlat hai na koi kar-e-duniya hai

dikha apne faqiron ko jamal aahista-ahista

muKHalif saf mein mera yar mujh se laDne aaya hai

uThaunga magar apni main Dhaal aahista-ahista

kabhi yakja nahin hote dilon ko toDne wale

badal jate hain un ke KHadd-o-KHal aahista-ahista

main apne hijr ko nigran bana kar lauT aaya tha

buna hai makDiyon ne zard jal aahista-ahista

ye main logon ke dil mein ghar jo kar leta hun ujlat mein

hua hai mujh ko hasil ye kamal aahista-ahista

ye kar-e-ishq hai aur is mein sab ghar-bar luTta hai

bichhaDte hain idhar ahl-o-ayal aahista-ahista

mere ghar mein ghamon ki aaj phir baraat aaegi

karengi dhaDkanen im-shab dhamal aahista-ahista

meri raftar ki koi yahan pe had na hoti thi

kiya hai ishq ne mujh ko niDhaal aahista-ahista

zaban ke zaKHm 'mustahsan' kisi ko bhulte kab hain

utarti hai daraKHton se ye chhaal aahista-ahista